Pak kohë më parë Institucioni Micro Credit Albania ka blerë një pjesë të portofolit të kredive të humbura nga bankat e nivelit të dytë. Fillimisht nisi bllokimin e pasurive të patundshme dhe i detyronte të merrnin kredi pranë saj me interesa shumë të larta.
Skema më pas zgjerohet dhe në lojë hyjnë disa zyra përmbarimi, notere, agjenci imobiliare, punonjës të bankave dhe kadastrës. Lidhjet dhe bashkëpunimi i këtij grupi është hetuar nga Ministria e Drejtësisë, por raporti i dorëzuar në prokurori nuk ka të gjithë emrat e bashkëpunëtorëve.
Sakaq një ditë më parë me kërkesë të Prokurorisë së Tiranës Gjykata aprovoi sekuestrim ndaj dy shoqërive Micro Credit Albania dhe “Final”, të dyshuara se kryen mashtrim me pasoja të rënda në dëm të mijëra qytetarëve si dhe pastruan para.
Sakaq njëri prej të akuzuarve me skandalin e mikrokredive, Olsi Ibro është vetëvrarë këtë të shtunë.
Sipas informacioneve të para, ai është hedhur nga një pallat në ndërtim, duke gjetur vdekjen e menjëhershme.
Kjo ngjarje ndodh një ditë pas sekuestrimit të dy shoqërive Micro Credit Albania dhe “Final” nga Prokuroria e Tiranës.
“Më datë 20.07.2024, në rrugën “Ramazan Shijaku”, dyshohet se është vetëhedhur nga lartësia e një pallati në ndërtim e sipër, shtetasi O. I., 45 vjeç, i cili si pasojë e dëmtimeve të marra, ka ndërruar jetë në vendngjarje.
Grupi hetimor po punon për sqarimin e rrethanave të ngjarjes”, njoftoi Policia.
