Gjashtë nxënës janë dërguar në spital mëngjesin e sotëm, pasi në një shkollë të Tiranës pati rrjedhje gazi.
Ngjarja ka ndodhur në rrugën “Don Bosko”, ku rrjedhja në sistemin e ngrohjes çoi në evakuimin e fëmijëve. Nisur nga çfarë raporton policia, fëmijët e dërguar në spital ndodhen nën kujdesin e mjekëve dhe jashtë rrezikut për jetën.
Mësohet se rreth orës 09:30, në ambientet e institucionit arsimor u ndje një erë e pakëndshme gazi, çfarë solli alarmimin e stafit pedagogjik. Menjëherë, të miturit u nxorën jashtë godinës, për të parandaluar një tragjedi të mundshme. Reagimi në kohë bëri të mundur pasjen nën kontroll të situatës, ku pjesa dërrmuese e fëmijëve ndodhen në gjendje të mirë shëndetësore, përpos shokut nga ndodhia në fjalë.
Ndërkohë gjashtë nxënës shfaqën shqetësime, kollitje dhe dhimbje koke, çka solli nevojën e dërgimit të tyre në spital. Kjo nuk është hera e parë që diçka e tillë ndodh në vendin tonë. Një rast i rëndë i rrjedhjes së gazit në shkollë ishte ai i katër viteve më parë në një shkollë 9-vjeçare në Shupenzë të Bulqizës , ku dhjetëra nxënës u dërguan në spital për ndihmë mjekësore, si pasojë e dëmtimit të kaldajës.
Në shkollë gjenden momentalisht shërbimet e policisë, të cilët po punojnë për normalizimin e situatës.
