Rrëzohet tenderi i Presidencës për blerjen e pajisjeve për kryerjen e transmetimeve live për televizionet dhe rrjetet sociale. Abuzimi i zbuluar gjatë kryerjes së procedurave e ka detyruar Komisionin e prokurimit të anulojë rezultatin e garës.
Gara e politikanëve me transmetime live në FB
Nxitimi i Presidentit Meta për t’i pasur këto pajisje në Presidencë duket se ka sjellë shkeljen e ligjit për prokurimet. Kjo do të thotë se edhe për disa javë, ai nuk do të ketë mundësinë “të konkurrojë” live në Facebook përballë ERTV-së së kryeministrit Rama, që mban vendin e parë për transmetime të tilla.
Duke afruar fushata zgjedhore, këto pajisje transmetimi bëhen të domosdoshme po të kemi parasysh pozicionimin e Presidentit në luftën politike. Kështu, një pjesë të buxhetit të institucionit Meta ka vendosur t’ia kushtojë ngritjes së një studioje të transmetimeve direkte. Bëhet fjalë për 13 milionë lekë që do t’i fitojë kompania që e fiton garën.
Abuzimi me tenderin
Por jo çdo gjë ka ecur normalisht, sepse një nga firmat që ishin në garën për pajisjen e studios presidenciale, është ankuar për skualifikim të padrejtë. Në mbledhjen e datës 16 dhjetor 2020, Komisioni i Prokurimeve Publike shqyrtoi ankesën me objekt shfuqizimin e vendimit të Komisionit të Vlerësimit të Ofertave për skualifikimin e ofertës së operatorit ekonomik “PC Store shpk”.
Tenderi “Blerje sistem transmetimi audio dhe video për mediat në Institucionin e Presidentit të Republikës për vitin 2020”, e ka fondin limit 1.291.666 lekë (pa TVSH), zhvilluar në 2 tetor 2020. Komisioni vendosi ta pranojë ankesën dhe të anulojë vendimin e KVO-së mbi skualifikimin e operatorit ekonomik dhe të urdhërojë korrigjimin e shkeljeve të konstatuara duke e kualifikuar atë.
Historia e tenderit të Presidencës
Në datën 23 shtator 2020 është publikuar në Sistemin e Prokurimeve Elektronike, procedura e prokurimit dhe në datën 2 tetor 2020 autoriteti kontraktor mbylli garën. Nga verifikimi në sistemin e prokurimit elektronik, del se më 16 tetor 2020 është kryer vlerësimi i ofertave të operatorëve ekonomikë pjesëmarrës. “PC Store” sh.p.k ka afruar 1,240,000 lekë, por është skualifikuar
Arsyeja e heqjes nga gara është se operatori ekonomik nuk ka paraqitur kontrata të ngjashme për furnizime të mëparshme. Në datën 22 tetor 2020, kompania ankimuese ka paraqitur fillimisht shkresat pranë Presidencës duke kundërshtuar vendimin e KVO-së
“Në mënyrë të veçantë, i drejtohemi Titullarit të Autoritetit Komisionit të vendosë ligjshmëri në këtë proces prokurimi, duke verifikuar edhe njëherë dokumentacionin e paraqitur nga ana jonë në tender”, shkruhej ndër të tjera në ankesën drejtuar Presidencës.
Në arsyetimin e anulimit të tenderit nga KPK thuhet se eksperiencat e ngjashme janë paraqitur nga operatori, prandaj nuk justifikohet përjashtimi i tij nga gara.
“Ankimuesi ka vërtetuar se ka kryer me sukses furnizime të ngjashme në përputhje me objektin e procedurës së prokurimit dhe konsiderohet i vlefshëm”, theksohet në vendimin e anulimit të tenderit.
Firma e skualifikuar ka furnizuar me të njëjtat materiale Kuvendin e Shqipërisë në vitin 2019, kur ka bërë pajisjen me sistem audio dhe video për sallën e mbledhjeve të grupeve parlamentare”, në të njëjtin vit ka bërë edhe instalimin e sistemit elektronik të votimit të Kuvendit të Shqipërisë.
“Autoriteti Kontraktor ka detyrimin ligjor të garantojë mirëpërdorimin e fondeve publike. Dhe me vetëdije ka shkelur parimet dhe qëllimet e prokurimit publik”, thekson vendimi duke iu adresuar i adresuar Presidencës.
