Ndërsa Elvana Gjata vendosi të arratisej dhe mos të jepte dëshminë e saj për vrasjen e ndodhur më 4 tetor, dy prindërit e këngëtares u morën në pyetje nga Prokuroria.
Në deklaratën e zbuluar nga “Panorama”, nëna e saj, Donika Gjata, deklaroi se është takuar për herë të fundit me vajzën më 3 tetor. Ajo ka thënë për hetuesit se Ervin Mata ka një vit që bashkëjeton me vajzën e saj, ndërsa Mevjol Bilo, komandoja në kërkim që dyshohet se ka goditur për vdekje Fabian Gaxhën dhe që ka plagosur Martinajn dhe Eljon Haton, është nip i saj.
“Donika Gjata, e cila ndër të tjera ka deklaruar së është takuar për herë të fundit me bijën e saj më datë 03.10.2018, ka njohje me Ervin Matën pasi ky i fundit ka rreth 1 vit që bashkëjeton me vajzën e saj, gjithashtu shtetasin Mevjol Bilo e ka nip të sajin”, shkruhet në dosjen e Prokurorisë.
Gjithashtu, i janë marrë deklarime edhe babait të Elvana Gjatës, i cili ka thënë të njëjtën gjë.
“I është marrë deklarim që tregon rrethanat e hetimit shtetasit Fatmir Gjata, i cili është i ati i shtetases Elvana Gjata, ku ndër të tjera ka deklaruar se Elvanën ka rreth 2 javë që e ka takuar, ajo shoqërohej shpesh me Mevjol Bilon, pasi bashkëshortja e tij e kishte nip dhe se me shtetasin Ervin Mata e bija e tij ka rreth 1 vit që bashkëjeton”, shkruhet në dosjen e Prokurorisë.
Në ngjarjen e 4 tetorit, ku mbeti i vrarë Fabian Gaxha dhe u plagosën 2 të tjerë, është i përfshirë edhe i fejuari i këngëtares, Ervin Mata, i cili ndodhet në kërkim nga policia.
Burimi: Panorama
