Ka disa produkte që ai “të vjedh” nga rafti i bukurisë, sikurse dhe anasjelltas. Kjo ndodh pasi bukuria na bashkon. Nëse disa vite më parë kozmetika konsiderohej se i përkiste audiencës së femrave, tani gjërat kanë marrë një kthesë tjetër.
Meshkujt shqiptarë kanë nisur që t’i kushtojnë gjithmonë e më shumë kohë kurimit të paraqitjes së tyre, duke mos u ndalur vetëm te rregullimi i flokëve apo i mjekrës.
Në rrugët e qyteteve mund të rastisim nga tipin shumë të kuruar te ai me mjekrën e gjatë dhe të parfumosur, sikur ka dalë nga berberi.
Në rutinën e bukurisë për meshkujt kanë hyrë produkte specifike të kujdesit të lëkurës, të cilat nuk ishin marrë në konsideratë asnjëherë deri më tani.
Por gjërat ndryshojnë kur bashkëjeton me gjysmën tjetër dhe arsenali i saj i kozmetikës bëhet edhe i juaji.
Jo vetëm se femrat dinë të kujdesen për paraqitjen e jashtme, por se shumë produkte janë menduar si për atë edhe për ju, kjo do të thotë që janë realizuar për t’u ndarë.
Krem për fytyrën
Rrudhat nuk janë të dukshme vetëm te femrat, por edhe të meshkujt. Me siguri e keni kuptuar që kremi juaj hidratues është duke u harxhuar. Dhe ai ka gisht në këtë. Nuk ka asgjë të gabuar që të përdorni kremin hidratues të së dashurës, mjafton që të tregoni kujdes ndaj lëkurës së fytyrës suaj.
Krem për duart
Sidomos në stinën e ftohtë duart tuaj plasariten dhe ajo ka atë kremin perfekt të duarve pa aromë, që iu parandalon nga skuqjet.
Zbutës për buzët (pa ngjyrë)
Nëse mendoni që zbutësit e buzëve janë vetëm për femrat gaboheni. Edhe buzët e meshkujt plasariten, ndaj një produkt i tillë kozmetike mund të jetë i përdorshëm nga të dyja gjinitë. Mjafton të mos jetë me ngjyrë!
Shampon e trupit dhe shampon e flokëve
Okej, e dimë që në çdo dyqan produktet e meshkujve dhe të femrave janë të ndara. Po çfarë rëndësi ka kjo, në fund të ditës të dyja shampot kanë të njëjtin efekt: flokë të shëndetshëm dhe lëkurë të pastër.
Xhelin e flokëve
Të gjithë femrat duhet ta pranojnë se të paktën një herë të vetme kanë përdorur xhelin e partnerit ose vëllait.
Sapunin
Pavarësisht ngjyrës apo aromës, sapuni ka të njëjtin efekt kështu që mund ta përdorni të dy.
Pasta e dhëmbëve
Mjafton që mos të ngatërroni furçat e dhëmbëve!
Maskën e fytyrës
Trendi më i fundit është ajo maska e zezë për heqjen e akneve. Edhe çiftet shqiptare duket se janë dashuruar pas saj.
Burimi: Iconstyle.al
