Një fenomen i rrallë astronomik do të ndodhë këtë javë, ku shtatë planetë të Sistemit Diellor do të rreshtohen në qiellin e natës. Marsi, Jupiteri, Mërkuri, Venusi, Saturni, Urani dhe Neptuni do të formojnë një linjë të dukshme, me disa prej tyre që mund të shihen edhe me sy të lirë, sipas Sky News.
Ndërsa gjashtë planetë kanë qenë të dukshëm që nga fundi i janarit, më 28 shkurt edhe Mërkuri do t’i bashkohet paradës, duke e bërë këtë shtrirje planetare edhe më të veçantë.
Sipas NASA-s, ky fenomen ndodh për shkak të rrotullimit të planetëve rreth Diellit dhe perspektivës nga Toka. Dr. Shyam Balaji nga King’s College London thekson se rreshtime të tilla ndodhin çdo disa dekada, duke e bërë këtë një ngjarje të rrallë për t’u vëzhguar. Marsi, Jupiteri dhe Saturni janë shpesh të dukshëm, por shtimi i Venusit dhe Mërkurit e bën këtë moment edhe më spektakolar.
