7 Marsi është një ditë e shënuar për arsimimin në Shqipëri, pasi është dita e mësuesit dhe një ngjarje historike që lidhet ngushtësisht me fillimin e arsimit në gjuhën shqipe.
Aktivitetet festive organizohen për të nderuar mësuesit dhe kontributin e tyre të jashtëzakonshëm në zhvillimin e arsimit dhe edukatës.
Kjo festë ka një rëndësi historike të veçantë, pasi përkon me hapjen e Shkollës së Parë në gjuhën shqipe në qytetin e Korçës, 138 vjet më parë. Kjo ngjarje ka qenë kulmore për përpjekjet e popullit shqiptar për ruajtjen e gjuhës dhe alfabetit të tij, në një periudhë kur mësimi në gjuhën shqipe ishte i ndaluar nga pushtimi osman.
Shkolla e Korçës qëndroi e hapur për gati 20 vjet, duke u drejtuar nga figura të shquara të Rilindjes Shqiptare, si Pandeli Sotiri, Petro Nini Luarasi, Nuçi Naçi dhe Thoma Avrami.
Ky kontribut i madh i patriotëve dhe veprimtarëve të shquar shqiptarë dëshmon pasionin dhe përkushtimin e tyre për përhapjen e diturisë dhe edukatës mes popullatës shqiptare, pavarësisht kushteve të vështira të kohës.
Festimi i 7 Marsit është bërë një traditë dhe çdo vit, në këtë datë, shqiptarët i kushtojnë nderim mësuesve dhe punës së tyre, duke theksuar rëndësinë e arsimit në zhvillimin e shoqërisë dhe kombit shqiptar.
