Në Turqi dhe Siri, si pasojë e tërmeteve të fuqishme të 6 shkurtit, deri tani kanë humbur jetën mbi 8.700 persona.
Zyrtarët e vendeve deklaruan ditën e sotme (8 shkurt) se 6.234 persona janë konfirmuar se kanë vdekur në Turqi dhe 2.470 në Siri.
Disa prej dëmeve më të mëdha janë regjistruar në provincën turke të Gaziantepit, ku qindra ndërtesa janë shembur dhe janë bllokuar rrugët, duke penguar përpjekjet e shpëtimit.
Presidenti i Turqisë, Recep Tayyip Erdogan, pritet që ditën e sotme (8 shkurt) të vizitojë zonat e prekura nga tërmeti i 6 shkurtit.
“Kjo është një prej fatkeqësive më të mëdha në rajonin tonë dhe në botë, jo vetëm në historinë e republikës sonë”, tha Erdogan.
Nga ana tjetër në Siri, operacionet e shpëtimit janë ndërlikuar për shkak se sistemi i kujdesit shëndetësor dhe infrastruktura është shkatërruar nga lufta civile që po zgjat që 12 vjet.
Dhjetëra shtete në mbarë botën kanë ofruar ndihmë emergjente humanitare, përfshirë dërgimin e ekipeve të kërkim-shpëtimit dhe furnizime të tjera të ndihmës.
Tërmeti prej 7.8 ballësh ishte më i fuqishmi që ka goditur Turqinë që nga viti 1939, kur 33.000 persona u vranë në provincën Erzincan. Mbi 17.000 persona u vranë më 1999 nga tërmeti në këtë zonë, që është një prej zonave me aktivitet më të madh sizmik në botë.
