Tre ditë pas hapjes së shkollave, Franca është përballur me rritje të shifrave të të infektuarve në të gjithë territorin.
Ministri i Arsimit Jean-Michel Blanquer tha të premten se 22 shkolla janë detyruar të mbyllen deri tani në të gjithë Francën, për shkak të rasteve me COVID-19, vetëm pak ditë pasi 12 milionë studentë u kthyen në shkollë.
“Në Francën kontinentale aktualisht ka 12 shkolla të mbyllura nga një total prej më shumë se 60,000, e cila është një shifër e vogël. Përveç kësaj, 10 shkolla në La Réunion (një departament francez në Oqeanin Indian) u mbyllën, gjë që shkon në 22”, i tha Blanquer radios Evropa 1.
Deri në 130 klasa janë ndërprerë dhe ministri tha se autoritetet po hetonin çdo ditë rreth 250 incidente në lidhje me COVID-19 në shkolla.
Këto incidente janë të lidhura kryesisht me faktorë jashtë shkollës, që lidhen me njerëz që mund të ishin infektuar gjatë verës, tha ai.
Nëse një shkollë raporton më shumë se tre raste të koronavirusit, shkolla mbyllet përkohësisht, tha Blanquer.
Më shumë se 12 milionë nxënës u kthyen në shkollë në Francë të martën, 1 shtator dhe kjo u prit me shqetësim nga disa sindikata të prindërve dhe mësuesve që shprehën shqetësime rreth planeve për rihapjen ndërsa virusi është ende nëpër këmbë.
Ministria e Shëndetësisë tha të enjten se kishte regjistruar më shumë se 7,000 infeksione të reja me koronavirus gjatë 24 orëve, për herë të dytë në dy ditë, nga një rekord prej 7,578 i vendosur në 31 mars.
Shtrimet në spital për virusin janë gjithashtu në rritje në Francë.
/FRANCE 24
