Caktohet nata e performimit të Shqipërisë në Eurosong. Festivali evropian i muzikës do të zhvillohet këtë vit në kryeqytetin e Suedisë në Stokholm.
Eventi do të nisë më 12 maj, ndërsa hedhja e shortit për renditjen e vendeve pjesëmarrëse u zhvillua dje.
Në këtë event marrin pjesë 37 shtete në gjysmëfinale dhe 6 të tjera që janë automatikisht në finale: Franca, Gjermania, Italia, Spanja, Mbretëria e Bashkuar dhe Suedia.
Shqipëria, e përfaqësuar nga Eneda Tarifa me këngën “Përrallë” do të prezantohet në natën e dytë të “Eurovision” në 12 maj, me 18 shtete të tjera.
Ky short përcakton vetëm se në cilën gjysmëfinale do të prezantohen këngët ndërsa radha e prezantimit do të përcaktohet pas dy muajsh kur të gjitha ato të jenë prezantuar.
Nga çdo gjysmëfinale, dhjetë vende do të vazhdojë në finalen e madhe më 14 maj, duke u bashkuar me gjashtë vendet e parakualifikuara. Në total, 26 vende do të përfaqësohen në finalen e madhe. Ndërkohë këtë vit votimi do të jetë ndryshe me qëllim që të zvogëlojë mundësinë e votimit të vendeve fqinj siç është kritikuar se ka ndodhur vitet e tjera.
Eneda, e cila u shpall fituese në dhjetor në festivalin e 54-t në RTSH, bëhet kështu e këngëtarja e 12-të shqiptare që merr pjesë në Eurosong.
