Sipas vendimit të fundit, 100 miliardë euro do të kalojnë si shtesë për buxhetin e mbrojtjes kombëtare në Gjermani. Ky njoftim është bërë i ditur nga kancelari Scholz.
“Më shumë se 2% e GDP-së sonë do të investohet në mbrojtje.”- u shpreh kancelari Scholz.
Rikujtojmë se ditën e djeshme, Gjermania i dërgoi 1000 armë antitank dhe 500 raketa tokë-ajër në Ukrainë, duke shënuar një ndryshim të plotë në politikën kufizuese të eksportit të armëve të Berlinit.
Sot, Rusia dhe Ukraina janë në ditën e katërt të luftës. Bombardime të rënda gjatë natës në Kiev goditën një depo karburanti, një tubacion gazi dhe aeroportin.
Trupat ruse kanë hyrë në Kharkiv, ku një betejë e ashpër po zhvillohet në rrugë. Rusia thotë se është gati për negociata me Ukrainën në Bjellorusi.
Ukraina gjithashtu është gati për negociata, por jo në Bjellorusi – vendi nga i cili janë larguar trupat ruse që po shkatërrojnë Kievin.
Presidenti i Ukrainës, Volodymy Zelenskyy ka nisur një apel për qytetarët në mbarë botën, që t’i bashkohen me dëshirë mbrojtjes së Ukrainës. Gjithashtu, ai shprehet se rusët nuk e mbajtën fjalën, pasi ishin shprehur se s’do të preknin qytetarët.
