ICONstyle > Aktualitet > Sot është dita prej së cilës vuajnë më shumë shqiptarët

Sot është dita prej së cilës vuajnë më shumë shqiptarët

Dita Ndërkombëtare e Drejtësisë festohet në të gjithë botën më 17 korrik  për të njohur sistemin emergjent të drejtësisë penale ndërkombëtare. Gjithashtu referohet edhe si Dita e Drejtësisë Penale Ndërkombëtare ose Dita Botërore për Drejtësinë Ndërkombëtare. 17 korriku u zgjodh për shkak të përvjetorit të miratimit të Statutit të Romës, traktatit që krijoi Gjykatën Ndërkombëtare Penale (ICC).

Korrupsioni është rikthyer si kryefjalë e raporteve ndërkombëtare për Shqipërinë. Bashkë me krimin e organizuar dhe drogën, ky fenomen vazhdon ta mbajë larg vendin nga Bashkimi Europian. Transparency International në “Vlerësimin e Sistemit Kombëtar të Integritetit – Shqipëria 2016”, nënvizon se faktor kryesor i nivelit të lartë të korrupsionit është politika dhe mungesa e pavarësisë së institucioneve.

“Transparency International- lëvizja globale kundër korrupsionit  tha sot se Shqipëria mbetet e prekshme ndaj korrupsionit për shkak të ndërhyrjeve politike dhe mungesës së pavarësisë në institucionet kyçe të mbikëqyrjes”, thuhet në njoftimin e TI.

Transparency International flet qartë:  “Shqipëria nuk i plotëson kërkesat e Bashkimit Europian për luftën kundër korrupsionit dhe nëse nuk ndërmerr reforma kyçe, kjo mund mund të pengojë integrimin në BE”. Studimi vlerëson se institucionet kyçe në luftën kundër korrupsionit si zyra e Prokurorisë, Gjykata e Lartë, Komisioni Qendror i Zgjedhjeve dhe Inspektoriati i Lartë i Deklarimit dhe Kontrollit të Pasurive dhe Konfliktit të Interesit janë subjekte të trysnisë dhe ndërhyrjeve politike, duke minuar aftësinë e tyre për të përmbushur detyrën e ndalimit të korrupsionit. Kuadri ligjor i Shqipërisë nuk garanton pavarësinë e këtyre institucioneve të rëndësishme nga pushteti politik, pavarësisht se reformat e fundit janë hartuar në përputhje me kërkesat e BE-së për hapjen e negociatave për anëtarësim.

Shtetet e Bashkuara të Amerikës kanë paralajmëruar tërmet në drejtësinë dhe politikën shqiptare, me reformën në drejtësi. Departamenti Amerikan i Shtetit ka publikuar raportin për vitin 2017 të klimës së investimeve në Shqipëri, ku theksi është vendosur te korrupsioni dhe reforma në drejtësi.

Nëse zbatohet plotësisht, reforma gjyqësore do të largojë korrupsionin, do të nxisë investimet e huaja dhe vendase dhe do të lejojë Shqipërinë të konkurrojë më me sukses në ekonominë globale”, thuhet në raportin e DASH. Më tej deklarohet se problemi kryesor i Shqipërisë është korrupsioni. DASH u referohet disa raporteve, ku thekson se Shqipëria është ndër vendet më të korruptuara në Evropë.

Shqipëria renditet e 83-ta nga 176 vendet në Indeksin e Perceptimit të Korrupsionit 2016 (CPI) të Transparency International.