Franca u trondit sërish të enjten pas një sulmi me armë zjarri në kryeqytet, ku humbi jetën një oficer policie dhe mbetën të plagosur dy të tjerë, përpara se autori të vritej nga forcat e sigurisë në Champs-Elysees. Atentatori duket se nuk ishte i panjohur për autoritetet franceze.
Media lokale ka bërë me dije se 39-vjeçari njihej si një nga aktivistët më potencial të grupit terrorist dhe prej kohësh mbahej nën vëzhgim nga policia e vendit.
Ndërkohë, Shteti Islamik, (ISIS) ka marrë përgjegjësinë ndaj sulmit. Pak pas krimit, nëpërmjet agjencisë “Amaq” të propagandës, ISIS ka thënë se sulmi në Paris është kryer nga një pjesëtar i tyre.
Rikthimi i terrorit në Paris shënjestroi sërish një prej zonave ikonë të kryeqytetit francez. Ai vjen në kohën kur vendi përgatitet për raundin e parë të zgjedhjeve presidenciale të dielën. Presidenti Francois Hollande u shpreh i bindur se sulmi kishte sfond terrorist e shtoi se forcat e sigurisë kanë mbështetjen e plotë të kombit francez dhe se në nder të policit të rënë në krye të detyrës do të zhvillohen homazhe
Prokurori i Parisit, Francois Molins ka deklaruar se do të bëjë me dije identitetin e autorit, mbrëmjen e së premtes në një konferencë për shtyp.
Burimi: CNN
