Shumë personalitete të shquar nga familjet mbretërore të të gjithë botës, do të marrin pjesë në dasmën mbretërore që do të zhvillohet sot në ambientet e Pallatit të Brigadave.
Dje sot u konfirmua prania e Mbretëreshës së Spanjës, Sofia. Një prej mikeshave të familjes, Princesha Lea e Belgjikës gjithashtu ka konfirmuar praninë e saj.
Gjithashtu do të ketë një prezencë të shkëlqyer nga Maroku dhe Irani. Në dasmë do të jetë e pranishme edhe Princesha Lalla Salma e Marokut, bashkëshortja e Mbretit Muhamedi VI i Marokut.
E veja e Perandorit të Iranit, Mohammad Reza Pahlavi, Farah Diba do të nderojë gjithashtu me prezencën e saj në ceremoni.
Të pranishëm do të jenë edhe Princi i Kentit, Princi i Luksemburgut, Princët e Liechtenstein-it dhe të afërm të Princ Lekës II nga linja e gjyshes së tij, Mbretëreshës Geraldine, anëtarë të dyerve fisnike të Evropës, me të cilët Leka II ruan marrëdhëniet familjare.
Për drejtuesit e shtetit ftesa ka qenë e hapur; u konfirmua prania e Kryetarit të Kuvendit të Shqipërisë, Ilir Meta. Ndërsa Presidenti i Shqipërisë Bujar Nishani nuk do të mund të jetë pjesë e ceremonisë për shkak të angazhimeve. Ende nuk është bërë e ditur nëse ka konfirmuar kryeministri Edi Rama.
