Ata u fejuan në tetor të 2012-s, kur ishin të dy 22 vjeç. Ndërsa dashuria e tyre i rezistoi kohës, pas katër vitesh Semela Mediu, vajza e ish-ministrit Fatmir Mediu dhe Bledian Ismaili, djali i kryebashkiakut të Vorës, Fiqiri Ismaili, celebruan këtë fundjavë martesën e tyre.
Në një ceremoni mbajtur në hollin e Pallatit të Brigadave, çifti bëri celebrimin pasditen e të shtunës. Ishin 3 ceremoni të ndara, organizuar të enjten dhe të shtunën.
Mësohet se të enjten në mbrëmje u organizua dasma e vajzës në një hotel në qendër të Tiranës, ceremoni kjo që ishte kryesisht për miqtë dhe bashkëpunëtorët e ngushtë të Mediut dhe Ismailit. Në katin e 23-të të hotelit u mbajt kokteji, ndërsa ceremonia zgjati nga ora 8 e mbrëmjes deri në 2 të mëngjesit.
Aty kishte të ftuar nga të tre kampet politike, mes të cilëve Namik Dokle, Lulzim Basha, Nasip Naço, Marko Bello, etj. Ndërsa këngëtarë të ftuar ishin Bujar Çiçi, Reshit Boka dhe Sajmir Çili.
Gjatë festës nuk mungoi muzika tradicionale popullore, madje sipas të pranishmëve edhe vetë Fatmir Mediu këndoi 23 këngë popullore.
Ajo që binte në sy ishte arredimi dhe dekori i sallave ku u bë dasma. Dasma e përbashkët u zhvillua të shtunën në mbrëmje te një hotel pranë bulevardit “Nënë Tereza”, ku ishin të ftuar familjarët, rrethi i ngushtë i të dyja krushqive, por edhe ish-kryeministri Sali Berisha.
Dy të rinjtë kurorëzuan dashurinë e tyre të lindur në bankat e shkollës, në kohë kur të dy studionin në Vjenë.
*Shfleto galerinë
