Dukesha e Kembrixhit nxiti reagimet e përdoruesve të internetit mbrëmjen e së dielës, pasi ajo theu kodin e veshjes së aktoreve, që u shfaqën të gjitha me të zeza, në ceremoninë e ndarjes së çmimeve “Bafta”.
Shtatzëna Kate veshi një fustan jeshil të errët nga dizajnuesit Jenny Packham, pas spekulimeve prej disa javësh nëse ajo do të vishte të zeza në mbështetje të lëvizjes së “Hollywood”-it, për viktimat e ngacmimeve seksuale.
Pothuajse çdo aktore u vesh me të zeza në tapetin e kuq, përfshirë Angelina Jolie, Jennifer Lawrence dhe Margot Robbie, duke e bërë zgjedhjen e Dukeshës që të binte më shumë në sy.
Tradita urdhëron që, Familja Mbretërore të shmangë çdo gjë që mund të interpretohet si një deklaratë politike, por pati spekulime se Kate mund të vishte një fustan të zi të modeluar për të treguar se ajo mbështeti lëvizjen “Time’s Up”, por gjithashtu që të respektonte protokollin mbretëror.
Ndoshta ajo zgjodhi që të përcillte mesazhin përmes aksesorëve, rripin e zi, kuletën dhe këpucët e zeza.
Disa femra reaguan në “Twitter”, duke u shprehur të zhgënjyera me Kate.
“E zhgënjyer me Dukeshën e Kembrixhit, që nuk u vesh me të zeza te “Bafta”. Nuk është diçka politike. Është diçka për gratë”, shkroi një komentuese.
Një gazetare shkroi: “E di që familja mbretërore nuk duhet të përfshihet në “protesta”… por a do të ishte vërtetë aq keq për Kate, që të vishej me të zeza? Ndihem e lënë në baltë”.
“Duhet të kishte qëndruar në shtëpi, nëse nuk do të shfaqte mbështetjen e saj për femrat”, shkoi një tjetër.
Nga ana tjetër, Dukesha kishte edhe avokatët e saj, që shkruanin se zgjedhja ishte e zgjuar:
“Fustani është një lëvizje e zgjuar. Jo e zezë, në respekt të protokollit, por e errët mjaftueshëm për të treguar mbështetjen”.
Burimi: Daily Mail
